JISCMail - WELSH-TERMAU-CYMRAEG Archives

Ysgrifennais at Fwrdd yr Iaith yn ddiweddar yn gofyn a oedden nhw’n ymwybodol o feddalwedd sganio a fyddai’n adnabod y Gymraeg – h.y. fel y gallwn weithio a+r testun wedyn, nid i’w ffotocopïo yn unig. Cefais ateb gan Colin Jones yn dweud eu bod nhw’n defnyddio Textbridge Pro 9.0, oedd yn gweithio’n iawn, er bod Textbrdige Pro Millenium, sydd ar gael erbyn hyn, i fod yn well, ond yn costio tua £40-£50.

Methais ddod o hyd i son am Textbridge Pro 9.0 ar y we, a’r fersiwn arall yn amlwg yn ddrud. O’r diwedd cefais rif ffon Cymorth Dechnegol y cwmni ym Mrydain, Scansoft, a holi yno. Cadarnhaodd y ferch mai dim ond y math diweddaraf yr oedd y cwmni’n ei werthu erbyn hyn, ei fod yn costio tua £60, ac na fydden nhw’n ystyried y Textbridge 1.1 (a gefais ar fy sganiwr) yn ddigon diweddar i haeddu “Diweddariad” yn lle prynu o’r newydd. Dywedodd y gall yr hen fersiwn fod ar gael mewn rhai siopau o hyd, ond byddai’r fersiwn newydd yn gweithio’n well efo Windows 2000, sydd gen i. Cefais ganddi rif ffon yr adran werthu, sef: 0870-870-8085.

Yno cefais gadarnhad bod Textbridge Millenium Pro yn gweithio efo’r Gymraeg. Dw i’n meddwl mai £49.99 oedd y pris a gefais – ond cefais gynnig gwell gan y ferch. Mae Pages Pro Millenium Upgrade, sydd yn cynnwys y rhaglen yna a rhai pethau eraill, ar gynnig arbennig am £19.99 (+£3.75 post). ‘Roedd hi’n fodlon derbyn bod Textbridge 1.1 yn ddigon da imi haeddu diweddariad, a wnes i ddim dadlau efo hi!

Gofynnais am faint yr oedd y cynnig yn debyg o barhau a dywedodd bod y cwmni’n tueddu i gadw cynigion i fynd tra roeddent yn boblogaidd “but this one’s starting to fade”.

Alla i ddim cadarnhau y bydd popeth yn gweithio’n iawn nes fy mod i’n derbyn y meddalwedd (gallaf ei ddychwelyd o fewn 30 niwrnod os nad wyf yn hapus). Efallai hefyd, ni fyddai’r un mor bwysig i’r rhai ohonoch sy’n cyfieithu o’r Saesneg i’r Gymraeg yn bennaf ag y mae i fi, sy’n arbenigo ar gyfieithu yn y cyfeiriad arall, ond mi fuasai’n drueni ichi golli’r cyfle trwy beidio a chlywed amdano.